 لي كوان يو

 بقلم : ناصر افندي فؤاد
مصر سنغافورة رايح جاي .. أحيانا كثيرة أتساءل هل يمكن أن نصل إلي ما وصل إليه الآخرون من نهضة ؟ أم سنظل نعيش علي صدى نهضة سابقة مرت عليها قرون كثيرة دون أن نحاول إحياءها ، علي الرغم من أننا نمتلك المقومات اللازمة للنهضة وما يعطلنا هو....
ناجح : صباح الفل
العبد لله : صباح الخيرات ، يا تري جبت كل حاجة مطلوبة ولا نسيت كالعادة ، الضيف اللي جاي راجل أجنبي محترم وعايزين نعمل معاه أحسن واجب ، الراجل هو عيلته أكرموني اخر كرم لما كنت عايش فترة صغيرة في بلدهم.
ناجح : هو من أمريكا ولا أوروبا
العبد لله: ولا أمريكا ولا أوروبا ده من جنوب شرق أسيا .
ناجح : جنوب شرق أسيا ، أنا يا باشا الجغرافيا عندي بعافية شويتين تلاته ، يعني من اليابان .
العبد لله : بدون جغرافيا وخلّينا في التاريخ أحسن ، من سنغافورة وأساسا من أصل عربي من حضرموت ، وبيعرف عربي وصيني وماليزي ، وإنجليزي كمان .
ناجح : ما شاء الله ممكن أشغله تورجمان عندنا في البلد ، بس تفتكر يبقى عارف تاريخ بلدنا .
العبد لله : التاريخ حاجة حلوة بجد ولازم نعرفه ، لكن الأهم لازم نخطط ونشتغل لمستقبلنا
ناجح : يا باشا المستقبل بيد الله والمكتوب علي الجبين لازم تشوفه العين .
العبد لله : إيه الكلام ده ، طبعا كله بيد الله ، لكن لازم نخطط ونشتغل ، زي الزراعة انت بتشتغل والرزق بتاع ربنا .
ناجح : خلينا في سنغافورة ، إحنا بنسمع إنها زي مساحة أصغر محافظة عندنا ، بس كل الناس بتقول إنهم شغالين زي الساعة السويسري ، وشكل التعليم عندهم مركز جدا علي اللغات.
العبد لله: أبدا هم عندهم تقريبا أصول كتيرة ، ماليزي وصيني وعربي وأوروبي ، غير حوالي ١٠ عقائد وديانات ، وعلشان كده "رضا السجاف" بيتكلم لغات كتيرة .
ناجح : دول أكيد عندهم مشاكل بالكوم ، إذا كان احنا عندنا أهلي وزمالك والنَّاس بيموتوا بعض.
العبد لله: أبدا دول ناس مسالمين وبيحبوا بعض وما عندهمش مشاكل، من سنين طويله جه لهم رئيس وزراء اسمه لي كوان يو ، جاب كل المسئولين والكبار في الديانات والعقائد ، أكبر شيخ وأكبر قسيس وأكبر حاخام وزعيم الهندوس وزعيم البوذيين طلعوا تقريبا ١٠ ، وطلب منهم إنهم يجتمعوا وما يخرجوش من الاجتماع إلا بعد ما يكتبوا كل الحاجات اللي شرائعهم وعقائدهم متفقين عليها.
ناجح : وطبعا اختلفوا على اللي المفروض يتفقوا عليه .
العبد لله : أبدا ما فيش حد عاقل بقول إن السرقة أو القتل حلال ولا في عقيدة أو شريعة بتقول الكذب حاجة كويسه ، هم اتفقوا كلهم علي مكارم الأخلاق ، وخرجوا بأنهم متفقون وعمرهم ما يتكلموا في الاختلافات وبكده سنغافورة بقت اقتصاد وشعب قوي .
ناجح : عارف سيادتكم ان الكلام ده صعب جدا عندنا ، بغض النظر عن الديانة ، تجارة الدين اربح تجارة في العالم التالت .
وعلى الله قصد السبيل .