ناجح البواب الشعب المصري العظيم

بقلم : ناصر أفندى فؤاد
السلام عليكم ورحمة الله وبركاته ..
عارفين احنا ليه بقينا كده ، وعارفين ليه في خارج مصر بقى كده ،طبعا حتقولوا إن كده هي هي كده .
لا يا شعب كده بتاعتنا غير كده بتاعتهم ، أيوه بجد وعلشان أقرَّبها لك يا شعب أحكي لكم حكاية سامي وأمين :
سامي وأمين نفس السن، زملاء دراسة نفس سنين الخبرة والاتنين اشتغلوا في مبيعات مصنع عصير ، بعد سنين من العمل والاتنين بيحققوا المبيعات المطلوبة منهم .. صاحب العمل رقى أمين خلاه المدير ، طبعا سامي زعل جدا وقرر إنه يستقيل لأنه اتظلم ، قدم الاستقالة لصاحب العمل مسببة ، صاحب العمل قال له ماشي بس قبل ما تسيبنا ممكن تشوف لي البطيخ اللي موجود عند المورد علشان إنتاج العصير ، سامي راح غاب ورجع قاله البطيخ كويس وينفع صاحب العمل سأله الكمية الموجودة عند التاجر قد إيه وبكام ،
سامي راح تاني للتاجر ورجع معاه المعلومات ، صاحب العمل قالوا اقعد اشرب حاجة لحد اخلاء الطرف ما يطلع ، وربنا يوفقك في مكان يتناسب مع قدراتك ، ونده امين وطلب منه يروح يشوف البطيخ عند المورد . أمين راح غاب شويه ورجع ، تقدم أمين بورقة مكتوبة لصاحب العمل، صاحب العمل طلب من أمين أن يقرأها لهما ، قرأ أمين " المورد لديه بطيخ جيد جدا تكلفة الواحدة من البطيخ ٢٠ جم بغض النظر عن وزنها واما اذا أردنا الشراء بالكيلو فثمنه ٧ كما أن لديه مخزون يقدر بثلاثة وتسعين حبة تزن كل واحدة منها حوالي سبعة كيلوجرامات.
كما أن لديه مزرعة تمكنه من أن يورد لنا من خلالها بطيخ للأربع أشهر القادمة بمعدل ١٠٢ بطيخة يوميا سعر البطيخة ٦ شاملة التوصيل. وقد قمت بمعاينة البطيخ فوجدته بحالة جيدة ولونه أحمر من الداخل كما أن مذاقه أفضل من الذي قمنا بشرائه في العام الماضي كما أن التاجر لديه ماكينة تقطيع البطيخ لشرائح وعلى إستعداد لعمل ذلك دون مقابل بمصنعنا". وهذا العرض ساري حتى العاشرة من صباح يوم بعد غد ونحن متأكدون أننا سنحقق أرباحا أكثر من العام المنصرم بحوالي ٢٢٣.٠٠٠ إذا قمنا بإتمام هذه الصفقة كما أن المبيعات الإجمالية ستزداد بنسبة ٣.٧٨% من إجمالي المبيعات المستهدفة على الأقل .
لقد قمت بوضع هذه المعلومات أمام سيادتكم في هذا التقرير. الرجاء التوجيه إن كانت هناك حاجة لهذه الصفقة حتى أرسل كل الأوراق المطلوبة لسيادتكم في غضون ١٥ دقيقة. بعد قراءة التقرير سلم صاحب العمل أوراق إخلاء الطرف لسامي وكان بها مكافأة نهاية الخدمة .
سامي فتح بالفلوس كافيه بيقعد هو وأصحابه فيه ، وأمين أصبح شريكا في المصنع وأصبح المصنع من أكبر المصانع في البلد وله حصة تصدير عالمية ، وسامي لسه ببجري يلم الكراسي علشان شرطة المرافق ما تصادرهاش . هو ده الفرق بين كده بتاعتنا وكده بتاعتهم.
وعلي الله قصد السبيل.
ناجح البواب أول دكه علي يمين العمارة جنب تلاجة الحاجة الساقعة .