 قرايب جارتنا

اقرأ لهؤلاء

التكنولوجيا .. وثورة في العلاج الذاتي
لا شك أن التكنولوجيا الحديثة باتت تلعب دورا استراتجيا في تطوير الخدمات الصحية العالمية بصورة تشكل قفزات نوعية كبيرة بداية من الأبحاث المتعلقة بتطوير
	تكنولوجيا محاربة الفساد  .. وصبر الشعب
التعلم خطوة خطوة في ممارسة الديمقراطية هو أحد أهم مكتسبات الشعب المصري خلال السنوات الستة الماضية لاسيما بعد أن نجح
الشباب .. واستراتيجية قومية للإبداع
يدرك الجميع أن مصر واحدة من الدول التي وهبها الله قوة بشرية لا يستهان بها ، إذ إن 60 % من السكان في عمر الشباب أقل من 25 عاما
تحديد حقوق وواجبات الروبوتات
كما يقال، لا قيمة لشيء بدون إثبات وتوثيق ورقي، وفي خضم الضجة العالمية حول النتائج المحتملة لدخولنا ثورة صناعية من نوع جديد، يقودها
الأمن الفضائي .. والتنسيق العربي المطلوب " 1- 3 "
يشكل الأمن والاستقرار، وحماية حقوق الملكية الفكرية أحد أهم متطلبات عملية التنمية الاقتصادية وإقناع المستثمرين

أصدقاؤك يفضلون:

	قرايب جارتنا

 بقلم : ناصر أفندي فؤاد
أخذ ناجح إجازة لمصاحبة جارنا العزيز للساحل الشمالي ولمارينا تحديدا ولكنه قطع إجازته بعد ٣ أيام.
العبد لله: إيه يا ناجح رجعت ليه وسيبت جارنا العزيز في مارينا؟
ناجح : لا يا باشا احنا كلنا رجعنا مفيش حد قعد هناك .. بصراحة الإجازة هنا وخاصة في العيد أحسن وأروق كتير جدا.
العبد لله: غريبة يعني القاهرة في العيد رغم الجو الحر أحسن من مارينا رغم جوها الجميل والبحر!
ناجح : يغور البحر. المراوح في القاهرة موجودة والجو الحر على الليل بيبقي لطيف، انما افعال البشر هناك لا تحتمل
. العبد لله: يا عم ناجح ملاك مارينا ناس كلها محترمة والأمن مستتب ولا انت تقصد موضوع الحوت الصغير.
ناجح : الملاك زي الفل وعشرة علي عشرة، وموضوع الحوت ده مش مأثر معايا لأني مش بنزل البحيرات أو البحر ، ممنوع علي العمال البحر والبحيرات ، العوم للملاك والمستأجرين فقط ، وبعدين يا باشا مين قال إنه حوت مش الحوت بيرش ميه علشان يتنفس ده مبيرشش ، فيه ناس قالوا ده قرش بس مبياكلش البشر مبيحبش اللحم اللي بيقطع ويغلط في أخيه قرش او حوت عنده نظر
. العبد لله : أمال إيه اللي رجعكم يا سيدنا دوختنا
. ناجح : جارتنا في مارينا صاحبة الشاليه اللي جنبنا كانت بتوضبه وطول النهار دق ورزع رغم إن ده ممنوع بعد شهر مايو ،لكن محدش بيقول لها بطلي ، تاني يوم وصلنا جه الراجل بتاع الرخام وبدأ يظبط الرخام بالصاروخ الساعة ٢ ص ، جاركم العزيز راح لها علشان يسكتوا ، قالت له إحنا صيف ومفيش حد ينام دلوقتي ، والعمال ماصدقت جبتهم يعني اضيع ايجار يوم في عز الموسم ، جاركم رد بحزم بطلوا دوشه وإلا حبطلكم تصلحوا لحد السنة الجاية زي القانون وأبلغ الأمن والحمد لله الست جت واعتذرت وظبطت الأمن وسكتت الدوشه ، لكن الساعة ٧ الصبح اشتغلوا وطبعا مقدرناش نقول لهم حاجة ، المهم خلصوا علي أذان المغرب وقلنا الحمد لله ، الساعة ٦ الصبح لقينا ٤ عربيات بتزمر و كل عربية مليانه ناس وشنط ، وفجأة خبط علي بابنا الجواني ، ياريت باب الجنينة ، انا جريت فتحت الباب لقيت التراس مليان عيال وشنط ، وراجل بشورت قال انتم ممشيتوش ليه ، إحنا مأجرين من النهار ده ، مأجرين إيه يا أخينا الشاليه ده ملكنا ومش بنأجره ، رد وقال آسف يظهر انه الشاليه اللي جنبكم بس احنا غلطنا ، حصل خير ، وراحوا نقلين علي الشاليه اللي جنبنا ، مفيش نص ساعة وخبط تاني علي الباب ، فتحت نفس الراجل سألني متعرفش محبس الميه فين ، لا يا سيدنا معرفش ، مفيش ربع ساعة وخبط تاني ، لقيت واحدة ست ومعاها حلة فيها لبن ، معلهش يا خويا الأنبوبة إما فاضيه يا مقفولة جامد ممكن تسخن لنا اللبن علشان نغير ريقنا ، أصل الرجالة راحوا البوابة علشان يدخلوا بقيت العربيات ، قلت في سري ياخبر بقيت العربيات ايه ياولية ده الشاليه اللي جنبنا اودتين بس وانتم عديتم عشرين نفر ، رحت فتحت لها الانبوبة ، طيب مفيش معاك كبريت علشان نولع البوتجاز ، علي بالليل طبعا الأغاني الشعبية والرقص والطبل والزعيق وريحة الشيشة وزبالة السمك ، واخيرا الرجالة اللي نايمة في الجنينة ومناظر متسرش عدو ولا حبيب ،جاركم العزيز قال لموا الحاجة وننزل حالا مصر ، ونزلنا فورا
. العبد لله: طيب ومبلغتوش الأمن ليه؟
ناجح: ودي تيجي ، طبعا بلغناه بس قال طالما جوه المساحة المخصصة وصوت المزيكا معقول منقدرش نعمل لهم حاجة ، دول وضعهم قانوني معاهم تصريح من صاحبة الشاليه انهم قرايبها ، بس لو مضايقين احنا نعرف محمود الجنايني ممكن يجيب لسيادتك قرايب وتقبض ٣٠٠٠ جم في الليلة ، وسعادتك تبقي خلصت من الدوشة وكسبت كمان ، ومفيش ضرايب ولا استقطاعات .
وعلي الله قصد السبيل

مشاركات القراء