اركن على جنب لو سمحت

بقلم : ناصر أفندي فؤاد

كثيرا ما يطلب الناس مني خدمات علي اعتبار أن لدى معارف وأصدقاء مما يسبب لي حرجا شديد سواء من السائل أو من المسئول.
ناجح: يا باشا سيد طلبات عايز خدمة من معاليك ويا ريت تقدر تخدمه، ده اللي بيعمل المشاوير البعيدة لكل السكان .
العبد لله: على الله أقدر أخدمه ، ربنا ييسر لينا وله ، إيه الموضوع يا مشاوير.
مشاوير: يا باشا سيادتك عارف إني باستعمل موتوسيكل في المشارير ، وبلف بيه كل البلد ، أجيب من الشرق للغرب ، كله أكل عيش ، بقلب رزقي وعايز آكل عيش من غير ما اتعب حد، ولا بحب المشاكل.
العبد لله: طيب إيه المشكلة يا مشاوير
مشاوير: من أسبوع كنت رايح مشوار في مصر الجديدة رحت قضيت المشوار وأنا راجع وقفت في إشارة جالي أمين شرطة وسألني عن الرخصة ، طلعت رخصة الموتوسيكل ورخصة السواقة وكله كان تمام ، الامين قال معلش اركن لو سمحت علي جنب علشان حضرت الظابط يشوف الرخص ، طبعا أنا ركنت ، الأمين راح لظابط قاعد علي كرسي وقدامه ترابيزة قهوة وعليها الساقع والسخن ، وكام واحد واقفين قدامه بيتحايله عليه . العبد لله: طيب وحصل إيه؟
مشاوير : أمين الشرطة غاب ورجع قال فيه اشتباه في إن الموتوسيكل عمل عمليات إرهابية ، الحق يا باشا ركبي سابت ، وبقيت مش عارف أقف على رجلي.
العبد لله: طيب المهم إيه المشكلة؟
مشاوير : الأمين بعد ما وقع قلبي ، جه وقال هات ١٠٠ جم وأنا اجيب لك الرخص وتمشي علي طول.
العبد لله: ودفعت ومشيت ، فين المشكلة تعبتني انت وأمين الشرطة المرتشي.
مشاوير : قلت للأمين أنا معاي ١٥ جنيه ، أول عن آخر خدهم ورزقي ورزق عيالي على الله، الأمين بص لي من فوق لتحت وقال فين الخوذة قلت له سيادة الأمين العتب علي النظر انا حاططها فوق راسي حضرتك عايز خوذة تانية، الأمين بص لي من فوق لتحت ، وراح غاب ورجع رجع لي رخصتي واداني وصل مكتوب عليه استعمال النور المبهر وبدون خوذة ، ما صدقت مشيت وطيران على سيادة اللواء اللي في اخر الشارع ، لقيت العسكري السواق بتاعه اديته الوصل ، تاني يوم جه وقال لي ، عوضك على الله في رخصة الموتوسيكل ده وصل أهالي مش ميري.
العبد لله: يعني إيه وصل أهالي مش ميري فهمني لو سمحت.
مشاوير: العسكري قال إن ممكن يكون أمين الشرطة والظابط مش من الداخلية أساسا وإن الوصل مطبوع في مطبعة اهالي مش مطابع الشرطة .

العبد لله: طيب انت عايز إيه بالظبط أنا اتلخبطت علي الاخر.
مشاوير: مطلوب واسطة من سيادتك علشان أروح اطلع بدل فاقد وميدفعونيش مخالفة النور المبهر اصل المخالفة معمولة الساعة ١٢ الظهر .
وعلي الله قصد السبيل