ناجح البواب جيلاتي في الفرن

بقلم: ناصر أفندي فؤاد

اختفي ناجح البواب لمدة أسبوع وعندما ظهر بادرته بالسؤال
العبد لله: كنت فين يا عم ناجح البوابة كانت مضلمة من غيرك .. الاحتياطي بتاعك مش على نفس مستوي التدريب العالي .
ناجح : ربنا يسترك يا باشا كله بحسكم ونفَسْكُم معايا .
العبد لله : انت كنت في المطار السري علشان كده مش عايز تقول كنت فين .. ولا إيه!
ناجح : لا يا باشا سيادتك عارف إني كل سنة بروح يومين قبل شم النسيم الساحل الشمالي مع جاركم العزيز علشان نفتتح الموسم ونوضب الدنيا.
العبد لله : بس شكلك استحليت القعدة وعملت أسبوع ماريناوي محترم.
ناجح : أبدا والله كله شغل وشقا ويا ريت وصلنا لحاجة ، سيادتكم عارفين إن جاركم العزيز عنده شاليه دورين قريب من "السوق التجاري" وعلى البحر ، من السنة اللي فاتت عنده مشكلة كبيرة مش عارف لها حل ، أو مشكلتان بصراحة والسنة دي قدم بلاغات للجهاز اللي ماسك القرية وكان رايح فاكر إن المشاكل اتحلت ، بس للأسف لقى إن المشاكل زادت .
العبد لله : يا ساتر يعني هو رايح يتفسح ولا يوجع دماغه.
ناجح : المشكلة الأولي بقت مشكلتين ، أصل جيرانه زرعوا شجرة جو الممر اللي بينه وبينهم ونص الممر اتسد وده قانونا غلط والمفروض أن الجهاز طلع قرار إزالة للشجرة ، رحنا السنة دي لقينا الشجرة بقيت شجرتين والممر اتقفل تماما وعملوه البعدا جراج ، ولما سألنا الجهاز قالوا لازم تقدموا بلاغ جديد لأن المعاينة الأولى لقيت شجرة واحدة وطلعنا بناء علي المعاينة دي إسناد للمقاول يشيل شجرة ولما راح لقاها شجرتين وهو متعاقد علي شجرة واحدة ولو أزال الشجرتين غلط ومعرفش الشجرة المطلوب إزالتها مين فيهم وبإذن الله نعمل معاينة جديدة وإسناد جديد بعد ما تعملوا بلاغ بشجرتين.
العبد لله : هو فيه ناس كده بجد أنا كنت فاكر إنهم في الأفلام بس ، طيب إيه المشكلة الأخيرة.
ناجح : المشكلة الأخيرة دي عايزه يتعمل عليها مسرحية ، قريب من الشاليه بتاعه وفي السوق التجاري كان فيه فرن بيخبز عيش هايل ، وكان الفرن بتاع ست كبيرة في السن طيبة ، المهم الست باعت الفرن السنة اللي فاتت واتغير نشاطه بقي محل سمك ومتخصص في السمك المشوي ، وهات يا شوي بره المحل في الهواء الطلق والهوا ياخد دخان السمك يعبق الشالية ريحة زفاره وريحة شوي تلاقي نفسك كأنك جوه الفرن من الريحة وطبعا كحة وعنين تدمع طول النهار والليل .
العبد لله : وطبعا انتم عملتم شكوى.
ناجح : من السنة اللي فاتت بس المحل فضل زي ما هوّ رغم إن اللوائح بتقول إنه لازم يعمل مدخنة وفلتر يمنع خروج الدخان على الشاليهات والغريب إنهم قفلوا وشمعوا معظم المحلات اللي في السوق التجاري اللي بتبيع وشغاله بما يرضي الله علشان عدم استخراج تراخيص أو لمخالفة شروط الترخيص وده أكيد من حقهم.
العبد لله : طيب ده هايل أمال ليه مقفلهوش؟
ناجح : علشان الشكوى إحنا مقدمينها تغيير محل من مخبز عيش لمحل سمك والموظف قال إن الترخيص مفيهوش ولا عيش ولا سمك المحل ده عندهم محل آيس كريم يعني مفيش حاجة عندهم تدل على إنه سمك وطبعا يبقى مفيش تلوث
العبد لله: وليه مطلبتوش منه إنه ينزل يعاين بنفسه.
ناجح : طلبنا يا باشا بس هو قال ممكن ينزل بعد الغدا أصله جايب سمك مشوي من محل الجيلاتي!
وعلى الله قصد السبيل