الحمام في العشة ولا طار

بقلم : ناصر أفندي فؤاد
معالي السيد الأستاذ الدكتور اللواء المهندس المسئول المحترم
السلام عليكم ورحمة الله وبركاته
للأسف مش عارف مين اللي مسئول علشان أبعت له و كده بكتب كل الألقاب اللي أعرفها علشان ميبقاش فيه غلط مع أي حد . كل مسئول يختار اللي هو عايزه ، في النهاية الموضوع أكبر بكتير من لقب ، الموضوع عايز من سيادتكم استصدار قانون ، القانون ده مش اختراع مني ، القانون ده كان موجود من زمان ، زمان كان اللي بيربي حمام مبيتخدش بشهادته ، كان زمان أي واحد بيربي حمام بيعتبروا ذمته أستك ، لأن الحمام بيغوي حمام من أي غيه ويسرقه وصاحب الغيه اللي سرقت بيقفل عليه أو يبيعه علشان يكسب فلوس ، أكيد سيادتكم عارف ، اعتبروه غير أمين وبيبوظ اقتصاد الأسر وبالتالي بيبوظ اقتصاد الدولة ككل .
معالي السيد الأستاذ الدكتور اللواء المهندس المسئول المحترم ، اللي بيحصل من بعض موظفي البنوك وبعض شركات الصرافة اللي بيسيطروا علي السوق يخليهم مينفعش يشهدوا في المحكمة ، الناس دي لازم تتعامل زي اللي بيربي حمام زمان ،او كان مشخصاتي بيمثل كان مبيشهدش في المحاكم لازم يطلع قانون نسميه قانون التجريس، يمنع به من يخرب اقتصاد البلد من الشهادة في المحاكم ،ونخليه ـ زي بعض الدول ما بتعمل ـ بدون جنسية .
معالي السيد الأستاذ الدكتور اللواء المهندس المسئول المحترم ، مينفعش أن كيلو الفسيخ ربنا يعود عليك شم النسيم بخير يبقي بـ ١٢٠ جنيها ولما أسأل الفسخاني يقول الدولار ارتفع ، معالي سيادة السيد الأستاذ الدكتور اللواء المهندس المسئول المحترم إيه دخل الفسيخ المنتج محليا في سعر الدولار الزيادة ممكن تكون في الرنجة المستوردة أما الفسيخ والبصل يزيدوا علشان الدولار زاد ده تسيب وتلاعب في قوت الشعب.
وعلي الله قصد السبيل
ناجح البواب
أول دكة علي يمين العمارة