أسعار المواد الغذائية

بقلم : ناصر أفندي فؤاد
لا أدري لماذا تذكرتها مع ارتفاع أسعار المواد الغذائية
علي حلة ب ميه كتير بقالها سبوع
عيلة كبيرة وملمومة قرصها الجوع
فقعر الحلة جلد فراخ كمان منقوع
وجنب القعدة طشت لعيش قديم ورجوع
سنين والفتة عيش بالجلد
أما الزفر ده شي ممنوع
ف طرف القعدة واد اسمر يفك الخط بالعافية
ما هي الماهية والعيشة يدوب كافية
عيال شغالة بلا قافية
في ورشة وفالرخام مطلوب وعلي ضهره يشيل الطوب
وبرضه القدم حافية
وجته في عز الحر بردانة بنظرة من قلوب جافية
ماهلجزمة تلاقيها بكام وانا رابط دوبارة حزام
ده حتى الشيخ يقول ده حرام
تبص لفوق وتتعايق
يا عم الشيخ وانا لا حق ولا طايق
ده راسي م الحمول مغروس و فاكر إن أنا فايق
ياشيخ رايق
أقولك إيه ده لو حتي الحمول بجنيه حشيل أطنان ووصل بيه
أصل البيه خدوده ورد فل عليه هدوم وحزام وجزمة تمام
فأيده كام رغيف أبيض عجيب النوع
بياكل زي ميت راجل صحيح مفجوع
وانا في داري عيلة كبيرة قرصها الجوع
تغمس عيش قديم شريناه بسعر رجوع
ولو كان الجسد كامل مهوش موجوع
لبيع كلاويه ولا تلاقي في عيني دموع.