ناحح البواب 90% .. في المشمش " ٢ "

بقلم : ناصر أفندى فؤاد
أثناء حديثي وناجح البواب حول قريبه المتحفظ عليه بالمستشفى لحين سداد تكاليف عملية كبيرة بالقلب كانت مؤسسة كبرى قد تبرعت بتحمل تكاليفها ولكن أحد كبار مسئوليها رفض السداد، ووضع عراقيل روتينية مستحيل تنفيذها ، دخل علينا أحد أقاربه الذي يعمل بمكتب احد كبار رجال الأعمال الكبار فسأله ناجح
ناجح: عملت إيه يا عبد الحق مع صاحبنا بتاع في المشمش ، نفعت الواسطة ولا راكب دماغه برضه.
عبد الحق : الحمد لله البيه اللي بشتغل معاه خلص الموضوع .
ناجح : يعني في المشمش بيه مضا وصرف.
عبد الحق : لا طردني من مكتبه وكان عايز يجيب لي الامن.
ناجح : إيه اللخبطة دي قول لي قريبك خرج ولا ما خرجش من المستشفى ، وحساب المستشفي ادّفع ولا نكسر الصندوق؟
عبد الحق : يا عم ناجح اصبر علىّ ، قريبك خرج في عربية إسعاف مجهزة ومعاها دكتور أخصائي وصّلوه لحد البيت كمان.
ناجح : شيء عجيب .. الراجل طردك وما رضيش يمضي وكان عاوز يضربك والعيان برضه خرج ـ دي فوازير شريهان ولا فطوطة ولا حسبة برما!
عبد الحق : ولا فزوره ولا حسبة بورما ولا برما بتاعتك دي، الحكاية وما فيها إن البيه اللي باشتغل عنده لما عرف اللي حصل ما كدبش خبر ، بعت واحد من عنده دفع كل فواتير المستشفى والإسعاف والدكتور المصاحب للعربية وخلص كل حاجه .
ناجح : فعلا الخير كله في مصر ، الحمد لله ربنا يخلف عليه، إنما انت ما قلتش ليه مشمش بك طردك؟
عبد الحق: البيه اللي باشتغل عنده كلمه في التليفون وقال لي روح هو وافق يمضي وأنا كلمته خلاص كل حاجة اتحلت ، رحت له قام مدخلني مكتبه وطلب لي شاي بعد ما كان بيسيبنا واقفين زي التلامذة اللي متذنبين قدامه ، ومضى على صورة الفواتير يصرف فورا ، أنا استغربت ما فيش أي حاجه اتغيرت كل الحكاية واحد مهم كلمه ، فسألته أمال يا باشا حضرتك ما كنتش عايز تمضي ليه ، رجع لورا وقعد يقول إنه بيعمل كده علشان يحافظ علي أموال البلد ، وحق الدولة وأنه خايف على البلد من الحرامية ، واللي بيستغلوا المواقف ، وقال كمان إن البلد دي ٩٠ ٪ منها حرامية والباقي بيسهلوا ليهم السرقة .
ناجح : أمال طردك ليه هو افتكرك من الـ ٩٠ ٪
عبد الحق : بصراحة الدم غلى في دماغي لأنه طلع البلد كلها حراميه ! فسألته هو مش سيادتك من البلد دي برضه ، حضرتك بقى حرامي ولا بتسهل.
وعلى الله قصد السبيل